डिजिटल प्रोफाएलको महत्व तथा औचित्य
यो पार्श्वचित्र फाकफोकथुम गाउँपालिकाको आधारभूत तथ्याङ्कको सँगालो हो । यसमा गाउँपालिकाको समग्र भौतिक, जनसाङ्ख्यिकी, आर्थिक, सामाजिक, वातावरणीय, भौतिक विकास, ऐतिहासिक, धार्मिक, सांस्कृतिक लगायत संस्थागत पक्षहरुको तथ्याङ्कको अभिलेख रहेको छ । जसले गाउँपालिकाको भावी योजना तथा कार्यक्रम र नीति निर्माणको कामलाई आधार प्रदान गर्दछ । विभिन्न विषयगत विधा र भौगोलिक स्थानको आवश्यकतामा आधारित विकासका कार्यक्रम तथा रणनैतिक योजना तर्जुमा गर्न यस पार्श्वचित्रले यो गाउँपालिकालाई सहयोग गर्दछ भने सरोकारवालाहरूलाई समेत यस क्षेत्रको तथ्यपरक जानकारी प्रदान गर्दछ । यसका अलावा सम्बन्धित क्षेत्रका संघ संस्था एवं अनुसन्धानकर्ता, योजनाकार, शिक्षाकर्मी, समाजसेवी लगायत सरोकारवालाहरूलाई उपयोगी हुने भएकोले यसको महत्व रहेको छ ।
विकास निर्माणका खाका कोर्न सर्वप्रथम गाउँपालिकाको यथार्थ र आधारभूत तथ्याङ्क/Fact and Basic Database तयार पार्नु जरुरी हुन्छ । यो दस्तावेज गाउँपालिकाको घर घुरी सर्वेक्षण, संस्थागत सर्वेक्षण, वडागत सर्वेक्षण, विभिन्न समयमा जनप्रतिनिधि र कर्मचारीसँग गरिएका छलफल र यसबाट प्राप्त सकारात्मक सुझाव, तथ्याङ्क र सर्वेक्षणका क्रममा प्राप्त तथ्याङ्कबाट देखिएको गाउँपालिकाको समस्या, चुनौती, सम्भावना र आवश्यकताको तथ्यहरूको सँगालोका रूपमा रहेको छ । यो पार्श्वचित्र निर्माणको काम अनिवार्य र अर्थ पूर्ण रहेको छ । यसले गाउँपालिकाको वर्तमानको यथार्थलाई विश्लेषण गरी सोको आधारमा गाउँपालिकालाई उपलब्ध स्रोत साधनको व्यवस्थापन गर्न, उचित कार्यक्रमहरूको तर्जुमा गर्न, कार्यान्वयन एवम् अनुगमन मूल्याङ्कन गर्नका निम्ति मार्गदर्शकको काम गर्ने हुनाले यो औचित्य पूर्ण रहन्छ ।
